火箭想同安東尼分手

兩隊頭3節分數咬得好緊，到第4節，馬刺開始發力，就算占士夏登試過完成2+1，始終救唔番火箭，因為佢全場有25分、6個籃板同3次助攻嘅背後，招牌三分波13投得1中，加上基斯保羅得13分、4個籃板同4次助攻，目前火箭得4勝7負有啲危機感。

最慘嘅係，今場話病咗缺陣嘅安東尼，適應唔到成日喺外線等波射嘅角色，好少機會發揮到佢嘅背籃打法，即使佢接受做後備，始終打得唔開心，同時火箭高層同時意識到，安東尼防守唔夠積極，遠射穩定性又唔夠高，討論緊係咪要提早同佢分手。

同日，湖人作客以101比86擊倒帝王，勒邦占士取得25分、7個籃板同2次助攻，帶領湖人完成2連勝，目前有6勝6負，出乎意料地勝率高過火箭。

76人撬占美畢拿組「4星陣」

至於東岸方面，76人尋日加時以106比112不敵灰熊後，即傳出佢哋同木狼已達成交易，以高維頓、沙域及巴利斯3名球員，加上2022年次輪選秀權，換入木狼球星占美畢拿及柏頓，換言之，76人有望排出由艾賓特、西門斯、富迪斯及占美畢拿組成嘅「4星陣」，衝擊東岸冠軍。