夢想FC小子悟出大道理 林樂勤：坐冷板得着仲多！

回顧於飛馬1年半的日子，「Jordan仔」認為自己上季落場時間較少，但卻能從中對自身能力產生更深認識︰「有啲人覺得我上年係失敗，但其實可能係自己初加盟嗰半季太順利，令人覺得太大對比。我覺得上季比初加盟嗰半季更加重要，因為當你踢得好嘅時候，你永遠唔會知道自己缺少乜嘢。上年我喺場邊睇，反而知道自己邊方面唔夠好，同埋點解自己會冇得踢，例如唔夠硬淨或者心態需要改善等等。」

林樂勤續說：「其實我都要多謝奇雲邦特，佢肯畀機會我試，始終飛馬係大會，一個年輕球員第一季只練咗一兩個月波，其實好難有得踢正選，所以好感激。另外要多謝『阿勇』（張志勇）、『阿皓』（黃俊皓）同埋『肇麒』（陳肇麒），無論場內比賽嘅心態，抑或場外要有嘅態度，佢哋都教識咗我好多嘢。」

實現一齊踢職業嘅約定

今夏轉投夢想FC，對林樂勤而言別具意義，爭取上陣機會固然重要，但能夠跟謝家榮、林衍廷及朱偉鈞這些在車路士足球學校（香港）的昔日隊友再並肩作戰，亦算是「夢想成真」：「今年真係好開心，我哋細個時已經定咗目標，第時要一齊踢職業踢到大，今年我哋試過4個一齊正選出場，嗰場比賽好難忘，總算實現到之前嘅約定。」

自從香港隊由新帥韋特上任後，不時有年輕球員入選或作補選，林樂勤年初未能入選省港盃名單，然而他強調會繼續努力爭取披上港隊戰衣的機會，並以陳俊樂為學習對象︰「希望依家喺球隊保住正選席位，可以踢嚟緊嗰屆省港盃，同被選入『大港腳』初選名單。長遠嚟講，當然想出外發展，無論係中超、中甲定係歐洲都好，想以陳俊樂為目標，同佢做過隊友，覺得佢係一個好好嘅學習榜樣。」

Jordan澄清唔係想做業餘兵

早前接受電視台訪問時，林樂勤表示因為踢波的同時要兼顧學業，結果一句「長遠嚟講會踢Part Time（兼職）」，引來不少球迷批評，Jordan趁機澄清，自己想表達的，只是在學業不受影響的情況下踢全職，而非當業餘球員：「依家都有好多球員讀緊大學，其實讀書係想保障番自己，對將來做教練或者其他管理上都有幫助，如果要我喺讀書同踢波二揀一，我一定會揀踢波，讀書只會喺唔影響我踢波嘅情況下去做。」

林樂勤Profile

出生日期：1999年2月2日

身高：1米75

體重：70公斤

位置：左中場

曾效力球隊：香港飛馬

現效力球隊：夢想FC

球衣號碼：27

圖/文：何彥霆