昨日NBA湖人主場以121比114擊敗金塊，錄得兩連勝。主場球迷比賽中大聲召喚入場睇波嘅高比拜仁，諗住打動佢復出，但勒邦占士喺危險關頭射入關鍵3分，塞住球迷把口，佢亦交出轉會後首次「3雙」，話畀球迷知「唔使等高比」！
缺少朗度同班頓恩格林嘅湖人同金塊今場比數咬住上，到第4節現場球迷忍唔到大嗌高比，希望氹佢復出，呢個時候占士嚟料，射入關鍵3分之餘，又試過剷籃大力入樽後，向高比坐嘅觀眾席方向大嗌慶祝，畀人解讀為「放心，湖人有我就掂！」最終占士獲28分、11個籃板同11次助攻，個人職業生涯第74次「3雙」，帶領湖人上仗開齋後繼續贏波。同日雷霆主場以95比101不敵塞爾特人，韋斯布克同保羅佐治夾埋入咗35分，都阻止唔到雷霆4連敗。
另外，前樂視體育高層賴汝正，與中資合作成立體育網台「體通天下」，購入NBA非獨家港澳播映權，11月11日起每日播2場NBA及相關節目，提供廣東話及英語旁述，惟評述員人選未定。「體通天下」昨日召開記者會，邀請前NBA球星Bruce Bowen來港主持開台儀式，執行董事暨行政總裁賴汝正稱：「『體通天下』網頁及Apps平台，可透過流動設備、電腦及電視收看。」屆時球迷將付費收看NBA，但收費未定。