銀牌8強激戰打孖上！
「高級組銀牌」戰火重燃，今日上演8強賽事，頭場下午2時30分於旺角大球場舉行，由東方龍獅對理文；尾場下午5時30分於青衣運動場上演，由佳聯元朗對富力R&F，激戰可期，球迷記得入場觀賞！
東方龍獅搶攻理文
東方龍獅聯賽接連擊敗夢想FC和冠忠南區，進一步逼近榜首，轉到銀牌戰線，主教練陳婉婷強調要盡早取得領先優勢：「理文會希望打持久戰，我哋31號有場比賽，佢哋就冇，預計佢哋會以防守行先，然後再打加時、12碼。今場我希望可以早啲打開紀錄，否則畀對手打起咗信心，之後會好難踢。」
「牛丸」：唔敢輕敵
對手近況雖然一般，但「牛丸」認為不可小覷：「理文踢法整體，近幾場有進步，唔可以用開季表現做標準，特別係淘汰賽，所以我哋會刻意防守佢哋嘅反擊。」東方龍獅踢畢銀牌8強後，於下周三會在主場迎戰佳聯元朗，5日內兩場比賽，「牛丸」透露目前人腳充裕，會因應戰術需要作調整，但強調不會輪換。
理文先後不敵香港飛馬和富力R&F，前鋒史提芬彭利拿上場更受傷，開季至今5場得1勝，今仗要面對「聯賽2哥」東方龍獅，「曉明Sir」坦承擔心球員多於成績：「球員表現先係我嘅壓力，我希望佢哋成長，踢得唔好我仲擔心。成軍初期好多時會迷失，到底我應該繼續定係好似以前咁做呢？呢個先係我最大嘅壓力。」
佳聯元朗鍊富力R&F
佳聯元朗今季面對強敵表現驚喜，對陣和富大埔、傑志都能和波，主教練郭嘉諾揚言要在90分鐘內擊敗對手：「盃賽一場過一定要有後着，法比奧等老將體能唔足以應付90分鐘以外嘅時間，對手都面對相同情況，相信大家都好想90分鐘內分出勝負，所以我希望今場波可以快上快落，早啲開紀錄。」
光Sir：最難踢嘅一場
元朗雖然是衞冕之師，但「郭Sir」認為壓力在對手：「我哋當然好想成功衞冕，但佢哋要有盃落袋先可以令投資者繼續投資，所以我認為壓力喺佢哋度。」左後衞陳柏衡上場傷出，「郭Sir」透露此子近日未能出席操練，能否上陣仍需觀察。
面對「青春班」佳聯元朗，富力R&F主教練楊正光坦言：「元朗開季到依家每場都有進步，佢哋有好外援，亦打到一貫嘅作風，所以我覺得今場係開季到依家最難踢嘅一場。」「光Sir」又提醒球員要謹慎：「因應對手嘅壓迫踢法，我哋喺控傳球要做得更好。對住元朗快速嘅反擊，一定要減少中場上傳球嘅失誤。」富力有隊長羅拔圖停賽，「楊Sir」卻不擔心防守會有影響！