落場3節轟51分居里歸位打殘巫師

史堤芬居里喺首節已經「暴走」攻入23分，當中三分球6投5中，隨後佢嘅手感未見冷卻，愈射愈有下交出51分、4個籃板同3次助攻，全場三分球16投11中，隊友杜蘭特及奇利湯臣分獲30分及19分進帳，鋒頭自然唔及「咖喱仔」。

今次「咖喱仔」歸位，成為奇利湯臣、安東尼同占士夏登以外，聯盟近10年第4個3節得分「50+」球員，同時亦係佢第6次單場射入11個三分球，難怪有網友話，如果勇士教練卡爾畀佢打埋第4節，分分鐘會破埋個人得分紀錄54分，同埋單場射入13個三分球嘅聯盟紀錄添！

夏登傷出 火箭不敵爵士

另一場西岸大戰，火箭喺主場89比100不敵爵士，由於基斯保羅因為打交繼續停賽，占士夏登取得29分、5個籃板同7次助攻後喺第4節傷出，注定火箭遭逢今季第3場敗仗。相反米切爾爆發獨得38分、5個籃板及7次助攻，協助爵士結束兩連敗走勢。