同樣效力過南華和愉園的陳志康、巴古沙和潘文迪，都對「南愉大戰，港甲經典」表示關注，並且不約而同希望兩隊他日能齊齊躋身港超聯。
*1995至2000、2002至2010南華；2000至2002愉園
「能夠效力過本港兩大老牌球會，兼且贏盡各大小錦標，作為一個職業球員，我係好自豪嘅。踢愉園時間雖然得兩年，但可以同「豪豬」（即蔣世豪）、加夫利、布力治、佩迪里佢哋做隊友，亦係好難忘嘅日子。至於踢南華就更加唔使講，好多人同事我依家都好記得。希望兩隊可以快啲升番上港超，個聯賽有埋佢哋就齊整好多喇。」
*1994至1996南華；1999至2000愉園
「在公在私我都好想佢哋快啲升番上超聯，因為南華係我喺香港第一間球會，愉園就係最後一間，所以佢哋喺我心中地位超然。之前我介紹過卡古特同保贊畀南華，今季加盟愉園嘅馬希卡歷亦係我嘅球員，加上摩域治係我之前介紹畀太陽飛馬嘅，大家明白我點解咁想佢哋升番上超聯啦！哈哈！」
*1997至2003南華；2006至2009愉園
「我諗無人會反對，南華同愉園係本地球壇好有代表性嘅球會，地位崇高，港超聯冇佢哋硬係差咁啲嘢咁。雖然依家南華同我冇任何關係，但我都好想呢間我踢咗6年嘅球會，可以重振雄風。至於愉園，我當然希望大家一直以嚟嘅努力唔會白費，可以成功攞冠軍兼升班啦！最後講多句，希望球迷朋友可以多支持南華同愉園，可能佢哋依家嘅搞波方針唔同，但其實都放咗好多心機喺青訓上面，為香港足球嘅未來出緊力。」