本地球壇兩支「老字號」南華和愉園，今午1時30分於蒲崗村道公園1號人造草上演的香港甲組聯賽交鋒。雖然兩隊先後離開頂級聯賽，但「南愉大戰」乃不少本地波球迷的集體回憶，愉園會方為免逼爆球場作出貼心安排，該隊facebook專頁將與on.cc東網同步直播。（on.cc東網周日下午1時30分直播）
因「遇人不淑」比南華更早脫離頂級聯賽的愉園，幾經辛苦今季終以乙組冠軍身份升上甲組，並且大舉增兵， 不僅招攬了陳立明、李志豪和王景華等具經驗的前港超球員，還落足本簽入3名外援，包括中堅摩域治、中場馬希卡歷，以及前鋒安度美斯。結果一開季即交出5連勝佳績，旋即被各界視為升班穩膽。
「開季以嚟的確交出令人滿意嘅戰績，但我已經喺一星期五課嘅操練中，不厭其煩咁提醒球員唔好咁快滿足，踢波一場一場計，開季連贏5場開心過就算，畢竟仲未對我哋嘅『假想敵』，要攞冠軍、要升上港超仲有好長嘅路，大家一齊努力啦！」愉園主帥岑國培謂。
問及對南華一戰，「岑培」強調儘管「少林寺」開季戰績未如理想，但「南華就係南華」絕對不會易應付。「就好似我踢南華嗰陣咁，我哋都係遇強愈強嘅，睇小我哋咩？你就有排受喇！所以今場我哋一定唔會輕敵！」「岑培」謂。
是役因傷未克披甲的南華「老將」蔡仲賢則表示，希望一班年輕隊友可以踢出爭氣波，並強調過程比戰果重要，他說：「計人腳呢場實好難踢，但都希望一班後生仔可以盡情發揮，珍惜落場機會。」球員時代外號「扒仔賢」的他，特別向球迷作出重點推介：「我哋左路球員11號嘅黃皓巂只得16歲，係球隊重點栽培之一，希望大家無論睇直播定現場睇，可以畀多啲支持佢。」
今場「南愉大戰」賽前雙方均大力宣傳，並且聯袂製作賽事刊物，到場觀戰的球迷記得索取啦！