梁峻榮即時嗌Yeah！
麥迪遜賽再入選亞運場地單車項目，港隊爭金牌又有着數！2018印尼雅加達亞運將於8月18正式開幕，場地和公路單車一向是香港爭奪獎牌的重要項目，上屆「牛下女車神」李慧詩在爭先賽和競輪賽摘下2金，張敬樂和梁峻榮都分別有銅牌落袋。日前更傳出好消息，就是港隊一向擅長的麥迪遜賽將會被列入今屆亞運場地單車項目。
夥拍張敬樂衝擊金牌
自2008年起，港隊在亞洲場地單車錦標賽8年內7次奪魁，張敬樂和梁峻榮這對好拍檔在2014及2015年亦曾經摘金。而今年二人除了在亞錦賽再奪冠軍外，在年初白俄羅斯場地單車世界盃亦成功踏上頒獎台，實力「有番咁上下」。經過多次項目修改後，麥迪遜賽終於成為今屆亞運項目，對香港來說絕對是好消息，對此梁峻榮表示興奮：「知道呢個消息之後覺得，終於有機會喇！因為呢項係我哋比較有信心嘅項目，都可以話減輕咗壓力，訓練上會冇咁擔心。」
雖然壓力減輕，但「肥榮」仍然不敢輕敵，會繼續全力備戰：「當時我即刻Whatsapp阿樂，問佢有無興趣同我夾麥迪遜，希望可以一齊衝擊我哋第一塊亞運會金牌。」