8年手足情互相扶持 吳松峻黃律堯孖寶籃兒
勇士「浪花兄弟」名震NBA，香港籃壇一樣有對「孖寶兄弟」，雖然效力不同球隊，但感情好過親兄弟，他們就是東方龍獅的吳松峻和遊協的黃律堯。8年前打地區籃球訓練認識，吳、黃二人一起走過不少難關，即使被看成「hehe味濃」也毫不介意，在籃球路上互相扶持，為理想而奮鬥！
外形性格愈來愈似
2010年，吳松峻、黃律堯還只是14歲的「小朋友」，二人參加了黃大仙區的籃球訓練班，從此結緣，「阿堯」說︰「當年吳松峻頭髮好長，好似『浩南哥』，咁啱佢嗰名又難讀，咪幫佢改咗『大佬』呢個花名。」雖喚作「大佬」，但其實黃律堯反而更像兄長，當吳松峻孤身在台灣讀書，心情低落時，就會向「細佬」求救：「我哋成日facetime，特別喺我之前受傷，或者打得唔好，都會喊住打畀阿堯。」
互相扶持，累積了8年的好感情，二人由外形、說話口吻甚至性格都愈來愈似，訪問全程都默契十足，好像能預測到對方的下一句說話。平日活動都形影不離，睇戲、去沙灘、做gym等等，二人更幽默地說：「可以說對方是不能缺少的一部分。」回想小時候每天像「連體嬰」的日子，兩人都會心微笑：「講吓打波，講吓打機LOL，細個真係好開心。」
說二人心有靈犀，好像「hehe味濃」，但他們的確無論食飯、打機，總是輕易就了解到對方的想法。成長雖然是人生的必經過程，這幾年二人都有不少改變，唯一不變的就是他們的友誼，兩兄弟亦有說話想對大家說。
黃律堯：「希望大佬下年台灣UBA可以入到8強，到時我一定到場支持。」
吳松峻：「希望阿堯打到一場，大家都認為係屬於佢嘅代表作。」
文／圖︰王藝霖