冠忠南區歷低潮再彈起 Ricky Sir坐過山車繼續衝
暫排港超第5的冠忠南區，今季經歷10場不勝低潮冇放棄，還靠蘇沙及馬高斯大爆發打番起，現時季尾仲有嘢爭，難怪主教練鄭兆聰（Ricky）亦坦言有點喜出望外！「Ricky Sir」今季領軍戰績如坐「過山車」，他期望球隊明日能擊敗和富大埔殺入足總盃決賽，給予球迷更大驚喜！
冠忠南區上兩季聯賽分別排第4及第3，惟球隊今季希望再上一層樓的時候，偏偏經常「贏形勢輸波」，更在不乏攻勢下以0比1僅負香港飛馬、和富大埔及東方龍獅，主帥鄭兆聰就認為球隊上了寶貴一課。
「Ricky Sir」說︰「今季有一段時間贏唔到波，喺我心目中有啲意外，或者受到唔同球員受傷、停賽影響啦。不過最令我感到意外嘅，係有時就算踢得好，我哋都攞唔到分，例如對傑志、香港飛馬同和富大埔，我哋都踢得好好，形勢亦唔錯，但最終都要輸波，失咗呢幾分令到我哋有啲沮喪。我諗最緊要係識得改變，同埋球隊高層畀信心同支持球員，好彩我哋後尾反彈番上嚟。」
留用弗爆蘇沙馬高斯
全靠馬高斯及蘇沙回勇，一度協助冠忠南區於下半季取得5連勝走勢，捱過低潮期，不過「Ricky Sir」反而希望入球能夠分布於其他攻擊球員身上︰「我對馬高斯今季表現絕對唔意外，呢個正正係我哋搵佢返嚟嘅原因，佢同蘇沙今季表現出色，兩位都係我哋想留用嘅球員。」
爭足總盃挑戰亞洲賽
Ricky同時補充：「舊年我哋球員入球分布較廣，今年無論夏志明、梁子駿、基奧、陸志豪等入球數字都降低咗，我同佢哋傾過，希望佢哋喺餘下賽事入番波！當然我哋好想打入足總盃決賽，如果贏到足總盃去踢亞協盃，更加係一個挑戰，球隊上下都渴望有呢個機會。」
本周賽程
足總盃
5月5日 （六）
冠忠南區 Vs 和富大埔
旺角大球場
下午3時
$80、$30（特惠票）
5月6日 （日）
傑 志 Vs 香港飛馬
旺角大球場
下午5時30分
$80、$30（特惠票）
文：何彥霆