唐咖名教守龍：咪安於現狀！
傷病對每位職業足球員而言，必定是最強大和可怕的敵人。職業生涯經歷過4次斷腳的唐咖名（Ming），因傷患結束球員生涯並嘗試轉行，但對足球的熱誠令他以教練身份重投球壇，為培育新一代本地鋼門出力，「Ming Sir」的教學宗旨就是不要安於現狀，盡量提升自我！
教練之路從兼職開始
今季為理文擔任守門員教練的唐咖名，在28歲正值當打之年，因一年內兩度斷腳而結束球員生涯，更要在床上休息了大半年才能跑步。當時徬徨無助的「Ming Sir」坦言，能夠轉型為教練全賴昔日福建隊友艾馬遜︰「當時我養傷之後試過其他行業。有次艾馬遜問我有冇興趣兼職教波，結果踏上教練之路，當時兼職教小朋友為主，但一做就做咗8、9年，算係接近番個球圈。我覺得最重要唔好放棄，諗嘢要正面。如果我諗好多負面嘢去逃避，就見唔到今日嘅我。」
多年得來的經驗，「Ming Sir」認為對他作為職業球員教練有所幫助，亦感謝前領隊兼行政總監馮嘉奇給予機會︰「當時有個學生想去外國試腳，而佢去咗西布朗青年軍練，跟住就持續同『馮奇』聯絡，令到今季獲得呢個機會。其實喺足球學校教波嗰幾年，佢哋畀咗好多機會我，由歲半至兩歲嘅小朋友，到舊年委派我去教港會一隊，喺唔同層面上都學到嘢。」
讚陸平中成熟
儘管理文今季成績未算突出，但對首次擔任職業球隊教練的「Ming Sir」而言，門將陸平中的表現令他高興︰「『平中』嘅表現令我由開頭嘅喜出望外，到依家老懷安慰，因為佢開始成熟同穩定。開頭都擔心佢只係得幾場嘅好表現，估唔到依家穩定性仲好高，當然佢仲有進步空間。」但「Ming Sir」亦勉勵一眾門將不要自滿，要定下更高目標︰「我自己喺職業生涯都未盡全力，會覺得自己做得未夠好，所以依家教人會比較嚴謹，希望佢哋唔會重複自己走過嘅路，最緊要唔好太易滿足及安於現狀，盡量去提升自己，甚至期望有海外球會睇中佢哋！」
圖／文：何彥霆