每當訪問南韓賽車女郎點解入行時，佢哋嘅答案不外乎因為享受呢份工作，或者享受被攝影機包圍嘅感覺，不過宋怡娜卻相當特別，佢表示入行原因係想同賽車近距離接觸，享受高速快感喎！
寓工作於娛樂已經相當難得，而寓娛樂於工作更係難能可貴。宋怡娜自細喺屋企人嘅薰陶下，對賽車運動有無比嘅興趣，長大後對賽車更係相當熱愛，因此大學畢業之後，就去做職業賽車女郎。咁點解唔係去做賽車手呢？原來佢最初真係希望成為一位賽車手，但卻遭到屋企人強烈反對，最後只好放棄。而喺讀緊大學嘅時候，有一位從事賽車女郎工作嘅前輩，得悉佢熱愛賽車活動，便問佢有冇興趣兼職做賽車女郎，唔單止可以同賽車近距離接觸，仲可以同賽車手交流，聽到對方咁講，怡娜便二話不說答應。
擁有迷人外形及魔鬼身材嘅怡娜，換上性感賽車女郎制服示人，誘人魅力爆晒燈，2006年喺釜山舉辦嘅賽事上初次登場，即時成為焦點，備受大家關注，於是模特兒事務所就問怡娜有冇興趣加入模特兒界，當時佢仍要兼顧學業關係，故推辭咗對方，只繼續兼職做賽車女郎。及至大學畢業後，怡娜終於作出改變，事關兼職咗兩年後，佢發覺自己非常鍾意呢份工作，結果喺2008年佢以職業賽車女郎身份出道。
出道之後，怡娜偶爾會客串做主持工作，訪問參加比賽嘅賽車手。怡娜表示起初相當緊張，擔心自己嘅口才未能應付得到，故請教有主持經驗嘅前輩，結果喺第一次進行訪問時，雖然出現唔少蝦碌場面，但總算能夠順利完成工作。
為咗令人氣推得更高，怡娜獲事務所推薦參加賽車女郎大賽，憑住超火辣嘅身材，以及對賽車運動深入嘅認識，令佢喺比賽中過關斬將，一直殺到入決賽，最終獲得最佳主持獎。呢次比賽唔單止令佢嘅人氣大大提升，更讓唔少人認識到呢位美女賽車女郎口才了得。
隨住賽車女郎工作上咗正軌，怡娜同唔少賽車女郎一樣，朝住模特兒發展。最初以為呢個轉變冇乜困難，點知做咗攝影模特兒後，先至知呢份工作一啲都唔容易，尤其係體能要求相當高。怡娜表示做賽車女郎總會有休息嘅時候，但係攝影模特兒往往要一連工作幾個小時，最長試過做足12個鐘，絕對係體能大挑戰，不過怡娜對事業充滿野心，呢樣又點難得到佢呢！
出生地：首爾
身高：170cm
三圍：35-23-34
簡介：宋怡娜同時兼顧賽車女郎同攝影模特兒嘅工作，但係佢冇因此感到壓力，反而愈戰愈勇，先後喺多本人氣時尚及美妝雜誌拍攝寫真，近年佢更客串做網絡主播，果然係精力旺盛！如果大家想了解佢多啲，就要Click入呢個網站喇！
網址：http://cafe.daum.net/sunny00411
撰文：魂