冠忠南區有「發哥」冇甩拖
李金年，冠忠南區球隊管理，人稱「發哥」的他不但負責球衣、足球、雪糕筒及欄杆，還幫球員搬埋麻雀枱。家住鴨脷洲、現年50歲的他表示：「我喺佢哋踢甲組時已經做兼職，逢星期四做，之前有個阿姐，因為屋企有事冇做，之後主席陳文俊問我有無興趣做長工，咁我就由南區升上港超聯第一年開始做，一直做到依家。每次練波我都會早個半鐘到，搬晒佢哋需要嘅嘢出嚟，分好晒啲衫同毛巾。」如此默默付出，冠忠南區認真有「發哥」冇甩拖！
冠忠南區主教練鄭兆聰以軍紀嚴明見稱，原來「發哥」亦無可幸免：「第二年我哋去泰國集訓，我哋又得一個總務，去到機場要攞好多嘢，喺香港機場漏低咗兩篋波衫，去到嗰邊佢又唔係認真鬧嘅，只係語氣唔係太好咁話：『點解會漏低呀』，因為好重要o架嘛，好彩嗰次主席陳文俊、領隊陳雄亮加埋副主席黃焯添遲一日去泰國，佢哋就幫我帶番啲行李過嚟，終能順利完成集訓。嗰次之後，我每次都會睇清楚啲行李寄晒倉先離開。」
同百厭星蘇沙過招
隊中王牌蘇沙與「發哥」一樣，已效力冠忠南區3年。談起蘇沙，「發哥」滔滔不絕地笑說：「蘇沙係一個大細路，好似有次球員嚟更衣室之後，馬天尼斯擺咗條儲物櫃鑰匙喺棵樹底下，走嗰陣搵極都搵唔到，原來蘇沙將條鑰匙掛咗落棵樹度，搞到馬天尼斯要去攞後備鑰匙先開到。」球員充滿鬥心，「發哥」也不甘示弱，誓把鑰匙找回來：「我唔忿氣，明明喺球場度冇可能唔見o架嘛，於是周圍搵，終於畀我搵到，原來有人掛咗喺棵樹度，嗰個一定係蘇沙，因為得佢咁貪玩。」
金牌管理變「摔角狂人」
說起貪玩豈能漏掉「子彈」夏志明？「子彈」還大爆「發哥」與蘇沙常常「玉帛相見」：「佢同巴西外援玩得特別埋，我哋每次去集訓佢都除晒啲衫同蘇沙佢哋玩摔角，我哋球員見到佢都好High。」訪問當日，球員得悉「發哥」受訪都向他開玩笑，指他是「金牌管理」。「發哥」的無私奉獻，讓球員都由衷讚賞，「子彈」憶述：「佢由頭到尾都照顧得好周到，我哋叫佢做任何嘢，佢都冇托過我哋手㬹，有次我要麻雀枱做道具，佢都喺香港仔叫架貨車幫我運過去，一啲猶豫都冇，所以佢真係好好人！」或許，這就是「發哥」最美的一面。
本周賽程
中銀人壽香港超級聯賽
4月13日（五）
傑志 Vs 香港飛馬
旺角大球場
晚上8時
$150、$50（特惠票）
4月14日（六）
R&F富力 Vs 冠忠南區
廣州燕子崗體育場
下午2時30分
$50
東方龍獅 Vs 理文
旺角大球場
下午5時30分
$80、$30（特惠票）
4月15日（日）
和富大埔 Vs 標準流浪
大埔運動場
下午2時30分
$80、$30（特惠票）
夢想FC Vs 陽光元朗
青衣運動場
下午5時30分
$60、$20（特惠票）
圖：何彥霆／文：陳焌鏗