難忘同和富大埔甘苦與共

球會由2002年成立，至今已經16年。咁多年經歷咗好多變遷同大大小小嘅事，有喜有悲，能與一班屋邨長大嘅隊友奪得足總盃冠軍、衝出香港，又試過一季內奪得銀牌冠軍，之後喺最後一秒畀對手入波搞到降班。降班之後嗰季，喺甲組最後一場過千球迷聚集廣福公園球場，慶祝球會重返頂級聯賽。好多謝我哋嘅贊助商同支持者，對我哋不離不棄，特別係和富社企嘅「李生」同「李太」，對球隊每一位成員嘅呵護！

我嘅球員生涯已步向尾聲，知道總有退落嚟嘅一日，心情有啲複雜，慶幸球隊管理層同教練，為我嘅將來打算。依家我喺球隊有兩個身份，作為球員要好好享受踢波嘅時間，同全力幫球隊攞到好成績，繼續享受球迷嘅歡呼聲！場外就同「阿智」一齊處理球隊管理同青訓發展。上年度有新嘅贊助商加入，喜見教練團同管理層各方面都發展得更加專業，希望可以用成績報答支持和富大埔嘅贊助商、球迷同街坊！謝謝。