王錦輝小學運動叻因功課少

王錦輝小學在2017/18年度沙田區小學校際足球比賽中，不論男子組還是女子組都取得冠軍。能夠在足球上取得佳績，教練曾昭添歸功於學校支持：「學校好支持運動發展，課堂期間有足球訓練班，課後亦有足球隊訓練，我哋好鼓勵球員出去外面投考球隊，因為喺學校得兩日訓練，我覺得唔足夠，我哋校隊所有男仔喺出面都有踢球會，所以足球方面成績比較好。」

考試考3科 鼓勵學生踢球會

他續指：「我哋學校嘅功課、考試比一般學校少，考試只係考中英數三科，所以學生就多啲時間參加體育活動。校方都好支持學生出外交流，有獎學金畀佢哋每年出外交流一次。我哋試過去日本參加足球訓練營，亦試過返大陸踢邀請賽，最近復活節假期仲去咗長沙參加一個國際小型足球邀請賽，從而畀佢哋接觸世界各地唔同嘅對手，多啲比賽藉此吸收經驗。」

今年獲邀參加NIKE五人足球賽，曾昭添大讚對校隊有幫助：「參加多啲比賽喺經驗上一定有增益，亦可以發展我哋嘅梯隊，校隊每年都會參加起碼10個比賽，一定唔可以派同一班球員踢晒，今次NIKE五人足球賽就可以畀機會新球員落場，令我哋喺發展唔同梯隊方面做得比較好。」

提升對抗溝通能力

另一方面，曾昭添覺得五人足球對球員有裨益：「對個人能力、球隊合作一定有幫助，球員喺對抗能力、同隊友溝通、合作亦都會有進步。」曾Sir又認為小學期間多接觸足球有助全人發展：「小朋友喺呢個年紀學踢波可以學到堅毅嘅精神，因為訓練、比賽都好刻苦，如果冇堅毅嘅精神係好難堅持落去。另外，可以畀佢哋學到團隊合作精神，因為足球係團體運動，如果唔同人合作、唔溝通係會做得唔好嘅。」

NIKE五人足球賽賽程

4月7日（周六）

11:00am至5:05pm

U8至U18各級8強及4強賽事

5:30pm至9:40pm

公開組分組賽及8強賽事、

U20組8強賽事

4月8日（周日）

9:00am至1:45pm

各級4強及名次賽賽事

2:10pm至6:40pm

各級決賽賽事

地點：旺角麥花臣球場