訪港教小將踢波 笠臣︰盼曼聯捧足總盃
曼聯名宿白賴仁笠臣昨出席香港賽馬會「同心同步同樂日」與小朋友交流足球技術外，亦見證了951位學生打破最多人同時為雕像塗色健力士世界紀錄。
對「三獅」爭世盃充滿信心
雖然退役多年，笠臣對曼聯仍甚為關心，對於球隊在歐聯16強出局，這位紅魔傳奇隊長直言失望︰「當然失望！因為同預期嘅表現有出入，好彩我哋打入足總盃4強，今季仍有機會取得錦標。始終今季曼城踢得太好，雄霸整個英超，難免令曼聯球迷心有不甘，希望我哋能夠捧走足總盃，再以聯賽次名衝線，然後喺下季再努力爭勝！」
2018俄羅斯世界盃將於6月揭開戰幔，61歲前英格蘭隊長白賴仁笠臣對一班年輕「三獅軍團」充滿信心：「修夫基畀好多機會年輕球員，對佢哋嚟講係好好嘅機會，希望佢哋唔好畀咁大壓力自己，分組賽順利晉級。去到世界盃，就係畀個舞台你向大家證明自己係世界級！對我嚟講，冇嘢比得上1982年代表英格蘭去西班牙踢世界盃決賽周，所有對手都係世界頂尖球員，絕對係球員夢寐以求嘅時刻啊！」