教練醒兩招徐遠成球技大躍進
上月踏入25歲的香港東方控衞徐遠成（Adam），於昨日迎戰忠信功夫一役，在父母齊齊現身撐場下交出4分、3次助攻及1次偷球，於艾利諾被罰離場後更擔起控衞重任，即使上陣時間未及外援多，但Adam在隊中仍發揮一定作用，如上月作客台灣寶島夢想家尾段，Adam在球隊被對手兩次追平下，先後射入兩個關鍵三分球拉開分差，助球隊最終獲勝。
生於籃球世家的徐遠成今季一圓職業籃球員夢，經過ABL等大型賽事洗禮，他認為自己球技有所提升，雖然在轉型中遇到困難，幸好有教練艾度托利斯一直在旁提醒：「教練幫到我好多，多到唔知由邊度講起。佢喺場上觀察到任何嘢都會同我講，尤其係細節，呢啲之前唔會有人提點我。我亦會經常主動問佢，大家講嘢都好直接，關係非常好。」
同外援老友鬼鬼
曾到美國留學並征戰NCAA大學籃球聯賽的Adam，講得一口流利英語，與香港東方陣中幾位外援有講有笑，不時與他們共同進膳，他直指隊中氣氛融洽：「其實成隊波嘅文化同氣氛都係由教練帶起，外援好聽佢話，成隊波好團結，依家我打波好開心。目標係繼續維持心態，有更大進步，幫球隊再攞多次總冠軍。」