傑志作客唔赦柏雷素爾
港超球隊傑志今晚6時30分出戰亞冠盃E組分組賽，作客火併同樣未打開勝利之門的去屆日職殿軍柏雷素爾，即使「藍鳥」主教練朱志光認為對手比全北汽車更恐怖，但將代替黃洋擔任防中的李毅凱，以及「關鍵先生」華杜斯指隊友會每人行多步，向支持者證明傑志有力於亞洲賽與強隊周旋！
（Now 672周二晚6時30分直播）
傑志亞冠分組賽兩連敗，且還未取得入球，今仗對手柏雷素爾全隊平均年齡只得約24歲，活力十足，以年輕球員配上兩位巴西外援基斯坦奴達施華及拉蒙盧比斯，兩位射手今屆亞冠已取得「士哥」，基斯坦奴達施華上季更以16球成為球隊神射手，對傑志威脅甚大。主教練朱志光指柏軍比韓職冠軍全北汽車更難應付：「我哋同組每隊都強，柏軍攻守實力平均，比全北更恐怖。翻睇比賽片段，佢哋嘅年輕球員可以成場不斷幫波，全隊夾咗好耐，默契亦純熟，比賽時可以輕易擊潰對手，而唔係單靠一、兩個人，令對手唔知針對邊個好，相對下更難打。」
李毅凱頂替黃洋
「藍鳥」中場重心黃洋早前受傷，無緣上陣，球迷擔心或會影響實力，朱Sir賽前就公布替代人選：「我會選擇派李毅凱填補空缺，佢後生有活力，而且位置亦適合，我有信心佢可以勝任。」「阿凱」希望與隊友「放開嚟踢」，每人走多步：「第一當然係做好防守，等機會入波。心態唔會再覺得唔夠踢，雖然亞冠係大舞台，但無諗住用輸嘅心態去打，每人走多步，盡力而為，我對自己有信心！」
柏市天氣昨日突然轉差，密雲滿布兼下起大雨，且吹起陣陣強風，由於比賽場地日立柏足球場三面看台均「冇瓦遮頭」，預料比賽環境或不理想。傑志昨日展開到埗後首課操練，朱Sir亦親身上陣「與眾同樂」，隊內氣氛良好。中場「關鍵先生」華杜斯認為吸收過去兩仗經驗，球隊發揮會更好：「我哋嘅信念就係要保持緊迫同硬淨，向球迷證明有進步，即使喺亞洲賽，我哋都有能力同其他球隊競爭。」
柏軍射手揚言盡量入波
至於兩戰得1分的柏雷素爾對出線仍未絕望，由於天津權健及全北都在傑志身上取得多個入球，該隊巴西射手基斯坦奴達施華表示要爭取多個入球：「教練團已詳細地分析傑志，感覺準備就緒。得失球差對我哋出線好重要，將用盡一切辦法去入更多波。」即使球隊以大勝為目標，但主帥下平隆宏提醒球員要防範傑志鋒將，當中前烏拉圭國腳科蘭當然成為焦點，負責把守最後一關的門將中村航輔亦相信這位曾於日職效力的射手會扮演重要角色：「我細個已經睇科蘭踢波，佢係一位有實力、射術好嘅球員。只要我哋避免重覆過去兩場分組賽嘅失誤，表現出強大防守，相信有力贏一場。」
．本周賽程．
亞冠盃分組賽
3月6日（二）
柏雷素爾 Vs 傑 志
晚上6時30分
中銀人壽香港超級聯賽
3月9日（五）
東方龍獅 Vs R&F富力
旺角大球場
晚上8時
$80、$30（特惠票）
3月10日（六）
冠忠南區 Vs 理 文
香港仔運動場
下午2時30分
$80、$30（特惠票）
3月11日（日）
陽光元朗 Vs 和富大埔
元朗大球場
下午2時30分
$60、$20（特惠票）
夢想FC Vs 香港飛馬
青衣運動場
下午5時30分
$60、$20（特惠票）
袁志浩柏市直擊