香港女足開創新天地
隨着張煒琪、劉夢瓊和陳詠詩於2015年遠赴日本試腳及落班後，外界對香港女足的關注度有所提升，今季張煒琪轉投澳職布里斯班獅吼，成為香港首位女子職業球員，更協助球隊奪得聯賽常規賽冠軍，再次引起回響。在資源較為充足下，香港女足希望透過出外集訓及安排友賽，令水平提升，引起更多人注意，並期望吸納新血參與足運。
3月8日婦女節快將來臨，適逢亞洲足協將該日定為「亞協女子足球日」，香港足總女子足球經理黃若玲（Betty）表示，希望今年可以加強學校方面的宣傳︰「舊年我哋正要準備對新加坡嘅國際友誼賽，所以冇特別安排活動。今年我哋希望喺學校做多啲推廣，會安排16間中學各派2名球員分成4隊打7人賽。我亦同咗裁判經理張炎有（Charles）聯絡，希望有女球證幫我哋執法，比賽會以嘉年華形式進行，希望大家一齊參與。其實女足喺香港都好耐，不過以前網上見到嘅資訊唔多，令外界認識唔深。好慶幸呢幾年喺學界嘅反應比之前正面好多，家長亦好支持我哋。」
Rambo全職教加強備戰
對於香港女子代表隊的發展，Betty認為現朝正確方向邁進︰「以往教練唔係全職，準備工作比較困難同辛苦，依家Rambo（女足主教練列卡度）係全職教練，多好多時間管理球隊。」為備戰8月亞運會，早前出戰賀歲盃的女足，剛於周日晚出發前往日本靜岡集訓，期間與3間大學球隊進行練習賽，Betty表示︰「我哋周日晚出發去日本集訓，搭凌晨機，之後又係凌晨5點鐘返到香港。呢個唔係錢嘅問題，係球員請唔到咁多假，但我哋希望用盡集訓呢段時間，所以佢哋係幾辛苦，有啲可能第日要返工添。」
香港女子代表隊自列卡度於去年10月執教後，雖然出戰省港盃及賀歲盃均告落敗，但於省港盃已在入球上取得零的突破，Rambo對一眾女將給予正面評價︰「當我接掌時，見到球隊有唔少進步空間，一班球員都好想去進步，態度積極，亦都好肯去學習，我相當滿意。當然，我哋要同強隊一拚時，體能同戰術方面都要加強，但球員有佢哋嘅難處，同時有工作喺身，佢哋嘅態度已經好專業。」
Rambo續說︰「我希望喺日本集訓觀察球隊由守轉攻嘅能力，今次集訓好高興有『煒琪』歸隊，好可惜隊長陳詠詩同門將梁蔚雅早前喺賀歲盃受傷，但對其他較少上陣嘅球員嚟講，會係一個好好嘅體驗。」
圖/文：何彥霆
本周賽程
中銀人壽香港超級聯賽
3月2日（五）
香港飛馬 Vs 理文
香港大球場
晚上8時
$80、$30（特惠票）
3月3日（六）
和富大埔 Vs 傑志
大埔運動場
下午2時30分
$80、$30（特惠票）
陽光元朗 Vs 冠忠南區
元朗大球場 下午5時30分
$60、$20（特惠票）
3月4日（日）
R&F富力 Vs 標準流浪
廣州燕子崗體育場
下午2時30分
$50
夢想FC Vs 東方龍獅
青衣運動場
下午5時30分
$60、$20（特惠票）