香港東方圍捕寶島夢想家
力爭衞冕東南亞職業籃球聯賽（ABL）的本地勁旅香港東方，今日作客再次出戰台灣寶島夢想家。雖然球隊已提早7輪鎖定取得季後賽入場券，但仍希望爭取最高名次出線以防後患，今日誓要搵位處榜尾的夢想家「開年」，香港東方狗年第一擊，不勝無歸！（有線62台周六下午3時直播）
首兩名出線 賽程有着數
香港東方暫時以11勝2負佳積高踞ABL榜首，成為首支取得季後賽席位的球隊，不過球隊副總監香振強坦言，球員放假後狀態仍要調整，今仗未敢鬆懈：「放咗3日假驚班球員狀態差少少，開操後逐步調整狀態，希望谷番起。我哋好認真對待每仗，本住輸或本住一定贏心態都會影響發揮，所以先要打好自己。」
今季季後賽賽制有所改變，常規賽首6隊出線後，第3至6名需先進行激鬥，為節省體力，香港東方定求最高名次：「頭兩名去到季後賽可以打少場，我哋之後仲有連場硬仗，好似3月要3鬥忠信功夫，雖然上次主場贏咗，但對方實力好強，呢3場可能影響排名。尤其係28日主場對功夫前一日，仲要出戰高級組銀牌，將係一大挑戰。加上菲律賓火焰自1月中起錄得8連勝，走勢不容忽視，我哋要盡早儲夠分數。」
東方陣內3位成員李琪、劉子禮及徐遠成昨晚為港隊出戰完世盃外圍賽後，今早即由南韓直飛台灣，上陣與否要視乎他們精神狀態。上次作客台灣，本地球員在早段拉開分差下獲更多出場機會，最後全隊12人有分落袋，惟港隊成員需4日3戰下，其餘本地球員角色更見重要。
鄧志恒望再「遍地開花」
當中大前鋒鄧志恒表示已準備就緒：「新年期間都有做Gym，操番起唔成問題，希望能盡快入局再次『遍地開花』。」他又指全隊都想攞個好意頭：「新正頭當然希望贏波開靚個頭，狗年願望係成功衞冕ABL，之後喺銀牌殺入決賽，個人方面希望每場得分上雙！」
榜尾的夢想家於早前更換外援，放棄主力丹尼爾，簽入6呎7吋的前鋒方迪，這位24歲球員兩次於ABL上陣命中率平均達5成，亦交出過「雙雙」數據，不過香港東方有上周再當選最佳亞援的史迪赫汀加壓陣，有力削弱方迪於籃底的威力。