安儀望化解壓力Keep住No.1

吳安儀落機大派利是，隊友朱佩瑩（左）及溫家琪都有份。

半夜致電爸爸報喜

在英國公開賽晉級16強後，吳安儀已夠分做世界1姐，收到最佳狗年禮物，她第一時間打給爸爸吳任水報喜：「我用視像打畀爸爸，但唔記得嗰陣係香港時間年初三半夜，佢哋瞓到朦朦朧朧，畫面黑漆漆，又見到隻耳仔，就同佢講早抖喇。」能夠登上No.1，「安儀」認為除努力外，成績是團隊合作得來，但這亦只是開始：「壓力一定有，如果想Keep住個排名，要發揮得更穩定，心態同技術都仲有好多地方要改進。」她直言排名升級是一個過程，要維持就是另一「大功課」，更笑言可能過幾周就「跌番落嚟」：「上上落落總會有，以我現時能力未必可維持到好耐，但無論排第幾，每場比賽都會盡力。」

• 「愛狗之人」安儀希望狗年繼續行大運。

回想2009年出道至今，「安儀」坦言估唔到：「因為讀書唔叻，都係諗住跟爸爸喺桌球室做吓嘢執頭執尾，冇諗過有呢啲經歷，可以去咁各國見識參加比賽。」下月將以衞冕身份到馬爾他出戰世錦賽，吳安儀表示：「上年贏冠軍，但要衞冕就要學識點去處理壓力。」吳安儀的最大勁敵仍然是伊雲絲，看到她在剛完成的英國公開賽打出一Cue過百，「安儀」稱更有動力去苦練求進。由年廿七離港參賽到初五返港，問到「安儀」狗年有何目標，她即說：「希望屋企人同愛犬身體健康，新一年參加更多比賽！」