港聯一團和氣郭Sir勁開心
將於年初四狗年賀歲盃交鋒的港隊及港聯，昨日先後在掃桿埔運動場操練。港聯主教練郭嘉諾喜見眾將「一團和氣」：「練波氣氛一流，以前唔同國籍嘅球員會分開一堆堆，今次好開心見到佢地『撈埋一齊』，蘇沙同高美斯『雞啄唔斷』，史必亦跟西班牙及巴西球員玩得好埋。」
至於「元朗3子」艾華頓、狄卡奧及法比奧缺席今課操練，郭Sir指狄卡奧有輕傷，艾華頓及法比奧則未有大礙：「法比奧同我講佢好開心，喺香港13年首次入選港聯，話終於等到呢個機會，佢亦係今次嘅隊長。」對於艾華因傷退出，早前表示會出6個前鋒的郭Sir則透露轉踢「無閘陣」，補選域陀後可做到攻守平衡。
卓耀國：要入波幫港隊攞威
另邊廂港隊前鋒卓耀國則豪言：「至少入1球，幫港隊贏波！今仗要證明我哋華人嘅實力唔會比外援差太遠，我哋同樣會搏到盡。」繼省港盃後再度入選，「阿國」稱：「好似畀教練同球迷認同我嘅表現，希望陸續有嚟。」對於外流一事，「阿國」回應：「踢埋今場波先，應承咗嗰邊唔可以透露太多。」
而港隊門將袁皓俊就希望在家人面前踢場好波：「年初四都差唔多拜晒年，新年節目梗係叫埋屋企人入場睇波，感受佳節氣氛。」面對港聯多名進攻好手，「肥袁」表示：「做龍門都係盡力去擋，希望零封對手，穩穩陣陣做到最好。」
圖：何彥霆
文：陳焌鏗