勇士贏波卡爾威過禪師

勇士周日於NBA常規賽主場以122比105擊敗馬刺,教頭卡爾唔止領軍打低自己師傅普波域治,仲超越建立公牛王朝的「禪師」積遜,成為聯盟史上最快達到250場勝仗的教練!

經過首節落後10分,勇士第2節發力輕鬆主宰比賽。雖然杜蘭特只得10分、6個籃板同6次助攻,但史堤芬居里有17分、4個籃板同8次助攻,即使第3節扭親腳都可以繼續搏殺,加上奇利湯臣有25分同3個籃板,協助勇士連贏兩場重拾霸氣。

馬刺方面,艾迪列治有20分、5個籃板同4次助攻,可惜阻止唔到球隊輸波,造就卡爾執教302場後,取得個人第250勝,並且以82.78%得勝率超越「禪師」積遜,成為聯盟史上最快獲得250場勝仗的教練,若非卡爾因病曾經長時間休養,甚至可以更早打破紀錄。

湯馬士首披湖人戰衣登場

同日,湖人作客以123比130不敵獨行俠,新加盟的「IT」湯馬士後備身份登場,結果佢轉會後首次上陣落場30分鐘,12投7中取得22分,又貢獻1個籃板同6次助攻,可惜仍未能保住湖人4連勝走勢。