投入跳繩世界 黃靖桐楊靖嵐Show Time
「全港跳繩錦標賽2018」次日賽事昨於南華體育會舉行，初級組比賽同樣雲集頂尖選手，黃靖桐和楊靖嵐兩位新星於是次賽事收穫豐富，各得多面獎牌，她們表示不會滿足現狀，希望能夠繼續突破。
「就算係畀人笑，我都唔會介意，因為咁先吸引到大家注意。」世錦賽銅牌得主11歲的黃靖桐於花式比賽時，喜歡加插跳舞、扭腰等動作，令評判留下深刻印象，全因她視每個花式比賽為「表演」，每次都希望帶點新元素：「我唔驚畀人笑，想畀大家見到我肯去嘗試唔同嘢啫！」繩齡達6年的黃靖桐已是第3年參加全港錦標賽，共贏得5金2銀，當中包括1面初級組個人花式金牌。
黃爸爸透露，愛女無時無刻都想跳繩，上學連小息、午息都會練習，對於女兒愛上跳繩運動，他表示全家人都極力支持：「頭兩次世界賽，我或媽媽都會跟去，但第3次我就畀佢自己去喇！我覺得跳繩令佢變得堅強，定下目標用全力去完成，我好欣賞呢份挑戰自己嘅精神。」
目標成為跳繩教練
至於贏得4金2銀的楊靖嵐，她於幼稚園參加暑期班後便愛上跳繩，現在每星期訓練3次，每次3至4小時。她從不埋怨，皆因和隊友一起「同甘共苦」是跳繩一大樂趣：「每次比賽聽到隊友為我加油，我就會即刻充滿力量。」楊靖嵐是漢華中學的中二生，她表示要兼顧跳繩和學業絕不容易，但仍會盡力，因為她有遠大的夢想，「未來最想做跳繩教練，希望發揚呢項運動，如果做唔成教練，都會喺運動治療方面發展。」花式跳繩動作難度甚高，由最初級的交叉繩到較高級的T.J.（跨下跳），可能要練習一年才能做到，兩位少女要經歷一連串「地獄式」訓練才有此成就，認真程度值得一讚。