居里轟49分揮低Uncle Drew
「咖喱仔」史堤芬居里同「Uncle Drew」艾榮邊個先係最強後衞？昨日上演嘅NBA常規賽勇士主場對塞爾特人，相信有咗初步答案。手風順到暈嘅史堤芬居里攻入今季個人新高49分，最終帶領勇士以109比105擊敗勇士，但艾榮今仗打到出神入化，一樣贏盡掌聲。
話晒今場有可能係今季NBA總決賽戲碼，兩位明星後衞當然要一騷哥利，結果「咖喱仔」下半場發功瘋狂搶分，當中3分球13次起手有8個命中，得到今季新高49分，「今場我當正係季後賽咁打，要話畀大家知我哋仍然係爭標分子。」做贏波功臣當然開心，不過史堤芬居里賽後亦擁抱艾榮送上祝福，並大讚「Uncle Drew」場上表現實在太強，「咖喱仔」話：「大家都攞出最強實力比併，艾榮喺場上進攻太瘋狂，絕對令人驚喜。」事實上艾榮亦使出渾身解數，今場18次起手有13次命中，當中包括3分球6投5中，為塞爾特人攻入37分，其中一次跟「咖喱仔」正面對決，以「Shoulder Fake」將居里擺脫後跳投得手，更成為比賽焦點。
傳保羅佐治補入明星賽
同日，雷霆作客以121比108擊敗活塞，完成7連勝；保羅佐治攻入26分、3個籃板及2次助攻，有傳佢將頂替因傷提早收咧嘅古辛斯，出席2018年明星賽，相信日前因偶像入唔到明星賽而狂轟選人制度不公嘅PG粉絲，可以順番條氣。