費達拿爆喊拎第20貫
費達拿又改寫歷史！這位手持19項大滿貫的得主，昨日在澳網男單決賽，打足5盤下以6比2、6比7（5比7）、6比3、3比6及6比1，盤數3比2險勝6號種子克羅地亞的施力，第6次稱霸澳網，亦成為史上首位贏得20項大滿貫的男子球手，賽後見慣大場面的36歲「費天王」亦忍不住爆喊，感動全場！
澳網6度封王大叫「冇得彈」
今場男單決賽在攝氏38度高溫下進行，利華球場亦要關閉天幕作賽。首盤「費天王」發揮出色，僅花24分鐘先贏6比2。及後雙方爭持激烈，力爭個人第2個大滿貫冠軍的施力奮力還擊，第2盤打至決勝局贏細分7比5，之後第3、4盤兩人各贏6比3，令比賽要靠終極第5盤分勝負。或因4強對手鄭泫中途退賽，費達拿體力未見跌Watt，雖然比施力年長7歲，「費天王」最後一盤仍能「爆Seed」大勝6比1，經過3小時3分鐘激戰後封王。賽後與澳洲名將安馬臣及前世界「1哥」祖高域睇齊，同樣6奪澳網，亦是其個人第20項大滿貫。
費達拿賽後表示：「我好開心，真係難以置信，我依家願望成真，神話竟然可以延續落去！經歷上季成功嘅1季，依家真係冇得彈！」至於力戰5盤輸波的施力，大方讚賞老友費達拿：「能夠打入決賽，對我嚟講係神奇之旅，呢兩星期係我生命中最好嘅日子，但Roger（費達拿）呢5盤打得實在太好喇！」