香港5虎揚威杜拜

戰車在場上風馳電掣。

港隊喺首日率先由前F1試車手方駿宇出戰，甫開賽已取得領先，即使之後曾因機件故障跌至包尾，但佢之後重返賽道，眨眼間就追番上領先車群，加上之後一眾港將同心協力，喺大部分時間都取得領先，最終激戰一日，以552個圈結束賽事，做出最快圈速2分09秒682，喺GT4組別率先衝線，總排名則係26位。

被扣減兩圈降落第2

不過，賽會指方駿宇曾違例駕駛超過兩小時，判罰港隊要扣減兩圈，致令港隊排名在GT4組跌落第2，無奈屈居另一支由英國車手領軍嘅鳳凰車隊，總排名亦降至28位，但無論如何，今次香港隊出色表現已獲得各界認同及讚賞。對於今次賽事，自2004年退役後再次復出，力證寶刀未老嘅關兆昌話，必須多謝一眾隊友對佢幫助，令佢得以輕鬆比賽。呢位香港車壇名將指出，今場港隊先後遇上3次爆胎及機件問題，但依然能夠將難題克服，最終取得佳績絕對值得驕傲！

港隊召集人兼車手李英健賽後坦言對失去冠軍感到非常失望，但能與4位隊友及車隊通力合作，比賽中經歷高低起跌克服困難，團結精神比任何一座獎盃更為重要，並感謝所有朋友、家人及各位車迷支持。

李英健（左）對車場上每刻變化非常關注。	方駿宇（左）同關兆昌落到場搏晒命。	賽車入Pit維修，充份展現團隊精神。