足總證金判坤離職 貝鈞奇：可惜但影響唔大

積極尋找繼任人

香港足總表示將會積極尋找繼任人選，香港代表隊在來年3月對北韓賽事之臨時教練安排會於稍後公布。「Kim Sir」將會在來年1月出任南韓足球總會技術總監，主要工作包括為國家隊提供技術監督、評估及支援，另外亦會負責甄選及委任南韓男、女子及奧運代表隊教練。

香港足球總會副主席貝鈞奇表示可惜：「都有啲可惜，佢服務咗咁耐，中國人有句話『天下無不散之筵席』，我相信唔難交接。啲球員踢慣踢熟，呢兩年世界盃外圍賽、亞洲盃外圍賽都打得有啲表現，相信唔會有咩影響。」

曾與「Kim Sir」共事的東方龍獅主教練司徒文俊，就讚「Kim Sir」領軍有方：「外籍教練嚟教代表隊，做到效果冇幾多個，『Kim Sir』算係做得較好嘅一個，佢唔係淨係顧住港隊就算，喺技術層面同青訓方面都顧及到，當然有好成績、有唔好成績，高、低潮一定會有，但總括而言係好嘅貢獻比較多。」

對於下任人選的條件，「司徒Sir」坦言選人存在不少困難︰「始終要搵啲有心有力嘅外國教練係困難嘅，球會又好、代表隊又好，搵外國教練返嚟又要教得好、有成績同時有前景係好少好少。當然，香港環境吸唔吸引到一啲好嘅外國教練都係一個因素；本地有幾多個教練可以應付到又係另一個議題，所以要選擇代表隊主教練，往往都係一個好大問題。」