讚火箭勁過上季勇士
火箭昨日NBA常規賽作客以118比95擊敗湖人，占士夏登攻入36分，帶領火箭完成7連勝。相反，波爾表現失色，而且第4節完全冇機會落場，搞到湖人教練禾頓冇晒辦法，甚至投降讚火箭勁過上季總冠軍勇士添！
禾頓賽後咁講：「照我睇，火箭先係依家聯盟最強。」其他人話火箭勁過勇士或者冇乜權威性，但禾頓曾經以助教身份，協助勇士奪得2014至15年球季總冠軍，佢夠膽咁講，一定有佢道理。
同日，勇士作客以123比95擊敗熱火，史堤芬居里取得30分、2個籃板同3次助攻，包括首節獨取16分，再次開啟3節收工模式，帶領勇士取得3連勝，杜蘭特有24分、3個籃板同7次助攻，表現同樣搶鏡。