擾攘咗一排，Now TV和Viu TV正式宣布，將會獨家播放明年俄羅斯世界盃64場賽事，當中19場賽事包括揭幕戰、2場準決賽同決賽都可免費於Viu TV頻道收看，今晚球迷亦可以提早熱身，因為今晚11時舉行的決賽周抽籤，Now TV和Viu TV亦會直播。
Now TV及Viu TV尋日進行聯合記者會，公布有關消息，電訊盈科媒體集團董事總經理李凱怡強調，佢哋嘅直播權係由國際足協直接授權，係獨家播放權。被問及之前因世界盃被吸引成為樂視嘅用戶，是否可以「過渡」到Now，李凱怡表示，有關球迷要重新申請Now：「不過針對呢班用戶，Now會提供非常吸引嘅優惠。」同時，現有Now用戶亦會有不同優惠，收費詳情將於1個月內公布。
至於除咗已公布嘅4場賽事，Viu TV會如何選取15場免費播放，香港電視娛樂總經理魯庭暉表示，由於今次世界盃於俄羅斯進行，比賽會喺晚上6點、8點、11點同凌晨2點開波，佢哋會優先揀於香港黃金時間進行嘅賽事，但一切都要留待今晚抽籤後，確定比賽戲碼才決定。球迷可能會擔心免費頻道播放嘅賽事戲碼會較弱，但魯庭暉表示，Viu反而會希望揀選最精采嘅賽事播放。
另據內地傳媒報道，樂視體育原以7,000萬美元（約5.47億港元）買入港區版權，日前以3,000萬美元賣予電訊盈科，來回蝕咗4,000萬美元（約3.13億港元）。