咁夠薑趕走大帝球證隨時打爛飯碗

勒邦占士（左）

面對前東家熱火，勒邦占士取得21分、12個籃板及6次助攻，韋迪攻入17分、5個籃板及4次助攻。然而，「大帝」占士於第3節結束前2分鐘，沉唔住氣向球證發牢騷投訴，期間更向球證Kane Fitzgerald作出揮拳動作，因而食咗今場第2個技術犯規被逐，令他的職業生涯蒙上小污點。賽後占士依然怒氣難消，投訴他多次在籃底位置被侵犯時，也沒有得到球證吹罰對手。至於被指「口出狂言」罵球證，占士堅持唔認衰，仲咁回應：「我只係講出我應該講嘅說話。」

• 布克（白衫）復出即以超級表現帶領太陽擊敗公牛。

出戰過千場首次被逐

事實上，勒邦占士出戰1,081場常規賽，再加217場季後賽，總數1,298場賽事才首次直接被趕出場。要知道NBA有不成文規定，球證不會隨便直接驅逐超級球星，所以賽後有騎士球迷喺Twitter留言，講笑話球證個飯碗隨時不保。

同日，太陽作客以104比99擊敗公牛，當家球星布克傷愈復出貢獻33分、9個籃板及4次助攻，加上禾倫有25分及7個籃板，協助太陽於第4節打出得分高潮，結束3連敗劣勢。另一方面，基斯鄧恩有24分、4個籃板及8次助攻，可惜阻止唔到公牛連輸6場。