登陸火箭首次攞分賀贏波 周琦孖住夏登搵食冇衰!
NBA周四賽事，火箭作客以119比97擊敗紐約人，「大鬍子」占士夏登取得31分、5個籃板同9次助攻固然搶鏡，中國「大魔王」周琦本季第3次上陣，完場前4分半鐘落場，一樣惹人注目，兩罰1中加上切入放籃，登陸NBA後首次得到3分，難怪賽後跟夏登影張搞鬼合照慶祝一番。
身高2米18嘅周琦落場不久就利用假動作擺脫對手，帶波殺入3秒區起手博到犯規，結果兩罰一中攞到加盟NBA後嘅第1分。防守上周琦亦畀到紐約人主將普辛基斯帶唔少麻煩，總算削弱了呢位拉脫維亞球星嘅得分能力。及後一次入楔組織本來可以表演「拆你屋」，但周琦選擇最穩陣嘅高點放籃，最終今場攞到3分為火箭大勝錦上添花。賽後周琦開心喺社交網貼上同夏登合照，但怕醜嘅佢以P圖遮住自己個樣，並留言為自己打氣：「萬里長征第一步，還有很長的路要走！跟着大哥，繼續加油！」有網友搞笑留言，問周琦係咪打完波就想跟住出名爛玩嘅「大哥」夏登去夜蒲？
另據美國傳媒透露，鳳凰城太陽隊巴原來喺萬聖夜開往布魯克林作客籃網前，曾經過紐約貨車恐襲現場附近，幾乎被捲入慘劇當中，幸好最後避過恐襲；而大難不死嘅鳳凰城太陽的確有運行，昨日以122比116擊敗主隊巫師，取得兩連勝！今仗太陽雖然一度被甩開22分，不過在第3節開始發力，最後禾倫攻入40分、10個籃板，加上新星布克交出22分及5次助攻，協助太陽反勝。
大帝甩轆 騎士4連敗
同日，騎士主場以107比124不敵溜馬；勒邦占士上陣37分鐘，22投14中取得33分、6個籃板、11次助攻同2次搶截，包括第4節攻入14分，可惜佢全場有8次失誤，加上完場前關鍵3分鐘連炒3球，即使星級後衞戴歷羅斯攻入19分，仍未能阻止騎士4連敗厄運。