ＮＢＡ變打摔角？勇士昨日主場以120比117險勝巫師，比賽期間出現混亂場面，導致積蒙格連同比爾奧被趕出場，最後史堤芬居里於關鍵時刻翻生，個人28秒內搶得8分，帶領勇士逆轉完成3連勝。
開賽冇耐勇士已經落後，到第2節結束前，勇士積蒙格連同比爾奧因為搶籃板爭位，發生肢體衝突，當時積蒙格連被扯衫兼箍頸，同對方攬埋一舊，場面猶如摔角，結果積蒙格連波衫都被扯爛，而且引發兩隊球員圍攏推撞，好在球證及時控制場面，未至於打大交。最後積蒙格連同比爾奧分別被逐，事件反而激發勇士球員鬥心，當中史堤芬居里於第3節結束前28秒，連入兩個3分兼射入兩個罰球，「咖喱仔」全場貢獻20分、5個籃板同8次助攻，加上杜蘭特嘅31分、11個籃板同6次助攻，成功幫勇士反勝。
同日火箭作客以109比93擊敗黃蜂，占士夏登交出27分、10個籃板同11次助攻「3雙」數據，慶祝自己加盟5周年，成功助火箭兩連勝，同時火箭上半場全隊共作出32次3分投射，創出聯盟新紀錄。