周琦上陣啦！首騷醒過姚明

5年半後再有中國球員亮相

自易建聯2012年4月27日為小牛上陣後，NBA已經有2,004日冇中國球員亮相，即使周琦喺「垃圾時間」被派落場，依然成為網上熱話。周琦落場後第1次傳球失誤，好在佢跟手「block爆」費雷爾，然後搶到3個籃板，證明自己「有用」。

回顧2002年姚明首次為火箭上陣同樣冇分冇助攻，而且得2個籃板，所以有網民話，周琦首秀好過姚明。當然啦，15年前姚明第8場比賽已經攻入20分，對於被安排做大後備的周琦來說，睇怕有排都追唔上。

其他比賽方面，勇士作客以101比111不敵灰熊，今仗史堤芬居里攻入37分，杜蘭特（KD）亦有29分進帳，可惜都要吃下今季第2場敗仗。完場前「咖喱仔」更因不滿球證判決，發脾氣「掟牙膠」上觀眾席，與向球證投訴的杜蘭特雙雙被逐。