袁振昇又入波 和富大埔兩連勝

標準流浪0:3和富大埔
袁振昇（左）連續兩仗有「士哥」。

「壽星公」黃威埋齋

兩軍於上半場初段展開拉鋸，直至19分鐘才有「入肉」攻勢，標準流浪黎洛賢右路傳中，摩域治於遠柱再二傳至小禁區，可惜門前的卓耀國失機。雙方其後有大衞拉菲爾及卡拉錫先後放冷箭，但均未能打破悶局。40分鐘，流浪隊長張國明殺入禁區起腳狂抽，不過又被對方守將羅素封出。完半場前大埔終於打開紀錄，陳曉鋒右路傳中，首次於港超正選上陣的射手袁振昇迎頂破門，連續兩仗有「士哥」，助球隊半場領先1球。

大埔換邊後繼續搶攻，只花5分鐘就由伊高沙托尼禁區頂避過守衞，左腳推大位射遠柱入網，為球隊擴大領先優勢。這位巴西外援兩分鐘後再突破，扭過門將後傳予袁振昇起腳，可惜被郭子堦飛頂護空門。流浪亦嘗試反撲，63分鐘卓耀國接應黃洛斬中第一時間抽射，但被曾文輝擋出。戰至81分鐘大埔由「壽星公」黃威「埋齋」，最後以3比0大勝流浪，聯賽錄得兩連勝佳績。

生日的黃威賽後獲大埔職員送上小蛋糕祝賀，他表示已獲得最好的禮物：「我好少生日撞啱踢波，今次贏波加入波係最好嘅禮物。我今季喺場上比以前冷靜，知道應該做咩，希望呢幾場表現可以令我喺港隊爭取到正選席位。」至於兩戰入兩球的袁振昇，就認為自己離入選港隊仍相當遙遠：「我知道自己仲有好多不足，例如防守上位置感仲要改善，進攻上多得隊友配合走位，先令我射最後一腳時輕鬆啲，依家目標係希望喺球會有更多上陣機會。」

和富大埔的羅素（綠衫）頂贏對手。

生日的黃威賽後獲大埔職員送上小蛋糕祝賀。