爆笑楊文蔚：我精神分裂！
「我覺得比賽前好似有少少精神分裂，成日會有兩把聲，不停同自己講：楊文蔚你到時要點樣做。」跳高女神楊文蔚（Cecilia）月頭跳出1米88打破港績，藉甜美外貌和弗爆身形，人氣即時爆晒燈！私底下的Ceci開朗健談，卻自爆是一個自信爆棚，甚至有自閉和精神分裂的運動員，聽起來複雜又有趣，日前她與奪得屈臣氏香港學生運動員獎的黃沅嵐接受訪問，讓我們一起了解楊文蔚的內心世界。
走進拔萃女書院，楊文蔚由踏入母校一刻，就恍似一隻「開籠雀」，與師妹黃浣嵐「雞啄唔斷」，由田徑隊談到學校老師，回憶一一湧上心頭。「我有幾年無返嚟，今次返嚟見到一班着住校服嘅學生，突然有種以前返學嘅感覺。」由排球女將轉型跳高，Ceci說起排球，同樣手舞足蹈：「當時好多隊友同我講，我跳起殺波嗰陣，成個世界好似靜止咗咁，因為我跳得高，同埋可以騰空好耐。」
「賽前自己同自己講嘢」
由學界到今天成為香港紀錄保持者，楊文蔚坦言自己比賽時，有時會自閉，有時更會覺得自己精神分裂：「最近好多個比賽賽前，我不停同自己講嘢，好似有少少精神分裂咁，自己會叫自己個名：楊文蔚唔該你一陣比賽時，注意你每一步，要點樣跑出去，踩準每一步，心入面成日都會有兩把聲，自己幫自己做心理輔導。」平日開朗健談的Ceci，更搞笑形容自己比賽前會變自閉：「我會自己坐喺度木無表情，淨係諗跳高，所有情緒都會在跳高的一下才釋放出來。」每個人釋放壓力的方式都不同，女神之所以一躍成為香港紀錄保持者，最需要就是保持良好的心態。
以1米88刷新香港紀錄後，楊文蔚回港依舊保持謙遜，但她卻道出自己的真實性格。「運動就係需要有少少自大，最近出去比賽，我會諗，你身高高過我，睇住嚟，我一定會跳得高過所有人，因為我彈跳力爆棚！」
「人生有許多事情，正如船後的波紋，總要過後才覺得美。」身為運動美少女，楊文蔚曾修讀中國文學，訪問當日大拋書包，以余光中的《我的四個假想敵》形容自己的運動員生涯：「好多時候你做緊嘢時候覺得好辛苦，好辛苦練習，但當你過咗1米88，全部嘢都會值得。」Ceci之後目標，希望挑戰1米90，並為2018年亞運努力！
楊文蔚Cecilia
年齡：22歲
身高/體重：1米73 /55kg
興趣：跳舞、烹飪、唱歌
跳高最佳成績：1米88（香港女子紀錄）
圖／文：王藝霖、黃兆崑