港男港女，係永恒不止、講之不厭嘅網上話題。港女周時被標籤為強悍、寸嘴、「不懂撒嬌」，令男士終日頭耷耷、眼濕濕，冇晒自信自傲英雄感，如果有得揀，就必揀台妹或內地女士咁話。波男年紀唔細，打打殺殺就唔好預我喇；大家不如好好諗吓自己真正需要，搵個適合嘅人，好過捕住討論區嗌到拆天。
公仔箱有《不懂撒嬌的女人》，球壇就有《不懂撒嬌的領隊》，每日全球無間上演。撒嬌係門溝通藝術，適當利用可氹到人心花怒放；呢門學問，適用於一切人與人之間嘅關係。要做一個成功嘅領隊，面對球會老細，除需獻上實績外，大家和顏悅色萬事有商量，份工先會做得長。領隊仲要服侍旗下球員，同每一個嘅關係都要小心處理，唔係死咗都唔知乜事。
莫連奴可算係不懂撒嬌嘅表表者。寸王對旗下所有戰將，都有嗰句講嗰句，佢一向認為球員已經擁有太多，盲目護短並冇好處。咁諗係冇錯，但本季無論上至伊巴謙莫域、米希達利恩，下至菲爾鍾斯、勞基梳爾，寸王都選擇「公開批評」，咁做只會破壞雙方關係。12年佢帶領皇馬破贏波紀錄奪取西甲冠軍，第二年就要走人，就係因為曾公開批評C朗，又同卡斯拿斯、沙治奧拉莫斯鬧翻。唔係話球星啱晒大晒，但莫連奴對待一班大帝嘅手腕，絕對有改善空間。
賓尼迪斯可謂另一個人辦；呢位曾帶領利物浦勇奪歐聯冠軍嘅名帥，不嬲勁愛紅軍，於離任後依然極度關注希斯堡球場慘劇可見一斑。但佢只視球員為棋子，私底下完全冇接觸，謝拉特就話過，同所有合作過嘅領隊都可以通電話，唯獨同肥賓冇偈傾。領隊同球員，的確可以只係互惠互利嘅專業合作，但缺乏心靈溝通嘅機械式「主僕關係」，喺足球呢項重視血性、士氣嘅運動入面，似乎並唔係周時行得通。喺肥賓執教之下，紅軍實力的確係有所提升，但最後始終同英超冠軍無緣，或者賓尼迪斯嘅孤高，就係利物浦只差一點點嘅關鍵。
當然，一段關係Work唔Work，淨係識撒嬌係唔夠，等於一個女人「呢刻嗲到你暈、下一刻就搵你笨」嘅話，都會畀人一腳踢去大西洋。不過，如果成功升到「撒嬌值」點都冇壞，領隊適當時候，對老闆球員球迷加番幾滴潤滑油，架車點都Run得順啲，揸多兩年冇咁頻能吖嘛！