「2016/17香港足球明星選舉」開始咗網上投票已經一段時間，足總周四（截至下午3時許）為「最佳足球明星（11人）」公眾投票嘅走勢，做咗個小統計。
球圈一直有個講法，就係有葉鴻輝一日，其他門將想攞獎都幾難。不過呢個情況今季可能有變！季中創出聯賽884分鐘不失球、效力冠忠南區嘅謝德謙，暫時以1,352票，領先得1,225票嘅「阿輝」。
「後衞」方面，傑志經過19周聯賽後僅失7球，難怪4名後防主將嘅票數，佔據頭4位。唔止「後衞」，傑志喺「中場」嘅票數同樣領先，帶頭嘅「左腳王」費蘭度暫得1,788票，令佢好大機會攞埋「最受球迷歡迎球星」添！至於喺「前鋒」票數放頭嘅，正正就係喺聯賽神射手領先嘅傑志前鋒辛祖，佢有1,604票。
未投票嘅就快啲去 www.hkfa.com/vote 投票啦！「最佳足球明星（11人）」公眾投票佔總評分嘅30%，各位置嘅得獎名單會喺截止投票後，加埋評審委員會、香港體育記者協會，同埋已登記嘅傳媒機構嘅投票先會得出結果。