5．7凌晨零時起網上公投堅．一人一票！

今季已經係東網第二次主辦「港超聯公投」，今季獲得車路士足球學校（香港）嘅支持下，「最佳金球」同「最佳撲救」兩個獎項嘅候選名單，由首季嘅各20個，大幅增加到各30個。所有候選「金球」同「撲救」都由專人喺港超揭幕戰（2016年8月26日），到「煞科」（2017年5月6日）期間嘅賽事中揀選出嚟，趁投票仲未開始，不如先同大家介紹一吓候選名單啦！

巴閉！楊賜麟2隊波2個候選

「最佳金球」30個候選名單中，最巴閉嘅相信都係「賜B」楊賜麟喇，點解咁講？事關上半季效力標準灝天嘅佢，上年9月24日喺主場斧山道運動場，入嘅一個炮彈式入球，一早成為候選；季中轉會香港飛馬嘅佢，喺今年4月1日對東方龍獅嘅聯賽，接應林樂勤嘅妙傳入嘅靚波，亦都成為候選，一季之內踢兩隊波有兩個候選，仲唔係最巴閉？

放大圖片	楊賜麟	東方龍獅英雄 葉鴻輝

「賜B」兩個候選「金球」風格完全唔同，一個狂抽、一個玩角度，其實其他候選「金球」都各具風格，好似第一時間「窩利」咁，香港飛馬嘅「BB」黎洛賢同東方龍獅嘅「儍邦」梁振邦就各有一球候選。上季憑一個「蠱惑角球」入波成為候選嘅香港飛馬中場迪亞高，今季就有兩個候選，一球係遠射、一球就靠同隊友美妙嘅組織。咁個人突破呢？梗係有啦！「扭扭昌」黎耀昌喺聯賽首循環替理文流浪兩破南華大門，其中「埋齋」嗰球，唔係無得候選嘛？

南華Mr. Right 高美斯	冠忠南區門神 謝德謙	港會門將 馬浩龍

至於「最佳撲救」，預期目前喺「2016/17香港足球明星選舉」，「最佳足球明星」守門員位置上票數爭持激烈嘅東方龍獅門將葉鴻輝，同冠忠南區門將謝德謙，同樣會鬥得精彩，因為兩人嘅高難度撲救都同樣有份候選。港會雖然護級失敗，但門將馬浩龍嘅演出，一直廣受球迷讚許同「行家」認同。當然仲有喺「富力地產菁英盃」決賽，施盡渾身解數嘅香港飛馬門神基斯贊，同和富大埔保羅啦，最後邊個會跑出，真係好難估呀！

各位球迷朋友，「車路士足球學校（香港）X 東網 2016-17中銀人壽香港超級聯賽」嘅「最佳金球」同「最佳撲救」選舉，由5月7日凌晨零時到5月15日正午12時，接受公眾投票，期間大家只要登入以下網址就可以投票：

「最佳金球」:https://goo.gl/9KY7z1

「最佳撲救」：https://goo.gl/X5dhEl

大家亦可以透過on.cc東網app或網頁，經右上圖直達投票頁面投票。兩個獎項將會喺5月17日「2016/17香港足球明星選舉」頒獎典禮上公布結果同頒獎。