德國《明鏡周刊》昨晨爆出驚天猛料，佢哋話有證據顯示，皇家馬德里巨星C朗拿度，喺2009年曾經喺拉斯維加斯強姦一名少女，而且事發後同對方傾掂數，透過律師畀咗37.5萬美元（約300萬港元）掩口費，令對方肯同佢和解。
德國權威《明鏡周刊》引入著名網站《足球解密》嘅資料，當中一份好關鍵嘅「和解合約」曝光。據報，強姦事件發生喺2009年6月13日朝早，呢份文件就喺約7個月後，即2010年1月12日先至簽署，合約中介人係C朗代表律師奧蘇里奧，合約中以「D先生」同「P小姐」嚟代表和解雙方。
文件列明C朗會支付37.5萬美元費用，換取「P小姐」對事件「永遠保持緘默」、「提供所有知道事件人物身份」、「永久銷毀所有關於事件嘅物件、紀錄等等」。《明鏡周刊》曾聯絡奧蘇里奧，但呢位律師表明唔可以透露任何客戶資訊，拒絕回應。唔只咁，《明鏡周刊》指女事主喺案發當日打電話報警，拉斯維加斯警局嘅電話錄音亦有紀錄，雖然女事主當時冇講到強姦者身份，但就有表示對方係公眾人物、一位運動員。
C朗嘅經理人公司Gestifute即時發聲明否認其事，話成單嘢都係傳媒老屈吹水，根本冇證冇據，而且唔排除會採取法律行動！Gestifute直指《明鏡周刊》所拎住嘅所謂證據，根本只係一封單方面從未寄出嘅信件，C朗更從未收過呢封信。而且被指係事件中嘅女受害人到依家都拒絕出嚟證實自己身份同件事，所以完全唔可信喎！
其實C朗過往亦曾牽涉類似事件，喺2005年佢仍然效力曼聯期間，曾經被控喺倫敦一間酒店強姦法國女子，並且被警方扣留問話6個鐘，不過事後因為證據不足獲准保釋，繼而喺1個月之後被撤銷指控。當時C朗代表律師表示，女方因為索取金錢不遂所以誣告C朗。