東方龍獅白鶴退出港隊引起軒然大波，同樣已淡出港隊的前隊長陳偉豪坦言體諒白鶴的心情，縱然明白入籍港腳已成大勢所趨，但仍期望港隊能定下小將接班長遠目標，「唔好為選而選」。
除白鶴外，不少年過30歲的常規港腳如陳肇麒及盧均宜，均落選今次亞洲盃外圍賽決選名單。34歲的南華隊長陳偉豪自2015年9月「中港大戰」上陣5分鐘傷出後，便未有再獲「Kim Sir」金判坤徵召。笑言認老的「偉豪」甘於讓位，亦體諒白鶴何故憤怒：「培育年輕人接班係正常不過，不過名單上亦有唔少近期冇乜上陣、又唔係後生嘅球員入選，白鶴嬲係正常。」
回想只得19歲便獲當時港隊教練利沙雲提拔上大港腳，「偉豪」認為以往的入籍兵雖不及現時多，但競爭同樣激烈：「我哋嗰陣同齡嘅有李志豪、吳偉超，前輩又有李偉文、馮繼志等，後尾仲多埋入籍嘅高尼路、謝雷。不過唔同嘅係高尼路同謝雷當年算係香港頂班外援，爭輸畀佢哋都心甘命抵。」場地不足問題長年未解決，青訓並非朝夕收成。「偉豪」明白港隊還需借助入籍兵爭取眼前成績，但亦是時候定下長遠目標：「如果只係為咗反擊外界批評而徵召年輕球員，唔係放膽畀佢哋落場，根本冇意思。當然土炮本身亦要爭氣，起碼喺23、24歲就已經要喺球會度證明自己能力。」