HK製造一樣得！港足4小虎發起青春革命

爭取眼前成績，還是孕育幼苗為重？香港足球談青訓，從來也是兩難。今次隨港隊西征的「年輕」面孔，其實也不算新鮮。陳俊樂早於19歲便曾在世界盃外圍賽後備亮相，李毅凱、梁諾恆、黃梓浩也是「香港B隊」常客。梁諾恆說：「我同樂仔、『王子』最初一齊踢過東方青年軍，後尾就喺亞少盃同阿凱做隊友。今次難得咁齊人，當然希望一齊上陣！」

梁諾恆黃梓浩最叻減壓

「細佬」梁諾恆是近年難得能在球會站穩陣腳的本土中堅，今季「上山」加盟南華於各項賽事正選上陣14場。過往不少年輕球員轉投大球會後，往往難敵壓力一沉不起，「細佬」揚言最緊要靠自己：「以前喺橫濱等細球會，就算輸咗都唔會有壓力，自從上季加盟香港飛馬，球會對各方面要求高咗，對我哋成長有好大幫助，轉投南華亦比預期更快適應。」

季中重返東方龍獅的左後衞黃梓浩，場外怕醜依然，場上卻愈戰愈勇不怯場：「亞冠盃嘅節奏同身體對抗都比港超強，雖然第一場比賽就拎紅牌，但反而可以提醒自己以後比賽要更加集中精神。Kim Sir早前特別同我哋幾個開會，提醒我哋唔好自製壓力。」

效力和富大埔的陳俊樂（左）被視為港足希望。

黃梓浩於省港盃入波光芒四射。

波牛陳俊樂讀書都掂

相比起「細佬」及「王子」轉戰大會覓挑戰，去年獲選「最佳青年球員」、又曾出任「B隊」隊長的陳俊樂，季前追隨恩師李志堅加盟和富大埔，除保持招牌勇悍攔截本色，更頻頻上前助攻。早前於富力地產菁英盃4強入球助球隊勇闖決賽，用表現粉碎質疑聲音。「我好清楚依家嘅我最重要係上陣機會，而且仲有一年半先至完成大學課程，大埔訓練時間較容易配合。既然自己當初決定咗要讀書，就只好咬緊牙關堅持，唔想半途而廢。」

李毅凱唔怕入籍兵競爭

有別以往足球員被視為讀書不成波牛，現時不少港超年輕球員也如樂仔邊踢邊讀。不過樂仔場外保持GPA過3的優異成績，證明只要時間分配得宜，也可兩者兼得。除了現實與夢想的掙扎，近年入籍猛將加入競爭，令土產小將上位更難。向來鬥心過人的李毅凱，拒絕就此投降：「相信每個土生土長嘅香港球員，都會以代表香港隊為奮鬥目標。我哋勝在較後生有活力，自己亦嘗試喺唔同位置發展，後衞、中場、左閘都試下，加強競爭力。」樂仔深信可與入籍兵互補長短：「不論任何國籍，只要係好球員都可以帶嚟良性競爭。好似伊達嘅積極態度，就為我哋建立榜樣。若然入籍球員能力好過我哋，我哋更加要不甘示弱，證明自己價值。」唔好畀人睇死，說到底，還是要自己爭氣，才能撐得起香港足球未來。