英超能夠成為受歡迎聯賽，除咗因為多球星睇之外，比賽節奏明快、身體碰撞多都係原因之一，所以以往英超中堅大多數係身型高大、踢法硬朗，以防守性高為主。
但現今足球往往講求戰術運用，對球員用波嘅能力要求大大提升，尤其係好多爭標隊伍都鍾意用一啲技術較好嘅後衞，好似巴塞隆拿嘅碧基、曼城史東斯及車路士大衞雷斯等等……技術好嘅後衞可以令球隊進攻點由後場發動，有利球隊保持高控球權，亦較易控制比賽。
我本身都係踢中堅，自己就較為欣賞大衞雷斯呢類型球員。雖然呢位車路士守將身體對抗性唔係特別強，防守又唔算硬朗，但佢高大得嚟夠靈活、技術好、包波夠快夠準，而且比賽參與度亦高，好多時見佢由後場帶波上前場幫手進攻；另外修咸頓中堅吉田麻也亦值得留意，佢係極少數能夠喺英超立足嘅亞洲後衞，論身體質素比起歐洲球員當然冇優勢，但用波能力唔錯及路數好，所以近期經常獲上陣機會，作為亞洲人更值得大家支持。
樂視體育香港星級客席評述，香港隊及南華中堅。兩子之父的他，除足球外亦熱愛攝影。
陳偉豪