方誠義原來係李健和徒弟
「如果真係鍾意一樣嘢，點會怕辛苦！」由綠茵球場踩入籃球圈，方誠義街場日練夜練，矮仔都可以變籃球大將！20歲初次對籃球產生興趣，「棄足投籃」日日打足12個鐘，起步遲但勝在努力，成為今天香港籃壇球星之一絕對不是偶然。由初生之犢變老將，33歲方誠義說：「我真係好鍾意籃球，唔會咁快退落嚟！」
方誠義在今天的香港籃壇舉足輕重，無論香港代表，抑或東方龍獅，「阿Ga」都是不可或缺的一員。黑實的皮膚，又高又弗是方誠義今天的外形，但小時候的他其實完全相反：「大家覺得我又白又矮，似日本人，所以幫我改名做阿Ga。」有誰又想到，當天矮小的「Ga仔」，會成為今天香港籃壇的球星！
學界足球猛將唔識拍波
從前小學、中學在綠茵球場上奔馳，亦曾經跟「和哥」李健和學踢波，可能當時的方誠義也沒有想過，籃球會變成他的職業：「當年在銀禧（現今體院）足球部上堂，最有印象係同和哥學踢波，嗰陣見到香港足球icon真係好興奮！」 在球隊擔任防中，亦曾經參加學界足球，為馬錦明慈善基金馬可賓紀念中學出戰，當年的「阿Ga」仍未發掘對籃球的樂趣。
「去到19、20歲標高之後，朋友就成日叫我落街場打波，又問我有無興趣組隊比賽，之後就加入元朗籃青，由康民盃打到出外比賽，慢慢鍾意咗籃球。」能夠成為香港籃壇球星，全靠當年的啟蒙教練，就是籃青的何澤仁。「當時何Sir經常帶我哋出外打比賽，由一開始拍波都唔好，慢慢知道籃球究竟應該點打。」除了何Sir，「阿Ga」在效力永倫時，亦從蔡芳裕和潘志豪身上學到更多籃球技術。
日操12粒鐘苦練投射
雖然起步比別人遲，但「阿Ga」付出的努力，絕對不比其他球員少：「由踢波轉打籃球，體力上唔會有問題，但射波真係要練番嚟，我以前由朝早9點打到夜晚9點，暑假基本上日日都喺街場打波！」自問不是天才球員，他就以加倍的汗水去彌補。由當初遊協到10年永倫生涯，再到今天成為東方龍獅職業球員，一步一步走來，全憑一股對籃球的熱愛。
曾經接獲中國甲B球隊邀請，「阿 Ga」雖然婉拒，但今天踏上職業籃球員之路，算是完成一個夢想，訪問期間他更自嘲說：「好似冇幾耐之前仲做緊細球員，點知依家已經成為老將！最重要保持體能，希望可以打多3、4年，唔想咁快退落嚟。」除了體力，33歲的「阿Ga」尚有多年來累積的經驗，傳承給新一代年輕球員。
場地提供：EvoFitness