梁嘉恆過大海捱出頭

每次搭船到澳門,也許你和我也曾發過同一個夢:「賭神」上身大殺四方,「滿載而歸」從此無憂。來自澳門的梁嘉恆,夢想成為職業足球員,曾經同樣遙不可及:「澳門環境太細,我哋唔係冇夢想,只係好快就被現實打沉。」2014年決心「過大海」圓夢,雄心未展卻被傷病擊倒;今季轉投香港飛馬,射破南華取得首個港超入球。用命運作賭注,除了運氣,還要腳踏實地去打拚。

「好多隊友冇諗過會出到線,只係請咗10日假。」似曾相識的電影情節,出現在去年11月的亞洲足協團結盃,澳門爆冷勇闖決賽,即使僅得亞軍,已為梁嘉恆帶來最佳球員榮譽。除了他,澳門隊的球員也有正職在身。「其實澳門打工唔止得賭場,普遍年輕人都想做政府工,始終福利好夠穩定。」

人口只得60萬的澳門華燈影照遊客不斷,卻走不出產業單一的迷局。在父母要求下,「嘉恆」順利完成大學學位,當初選擇傳播學系,只因「好多朋友揀呢科」,說到最愛的足球,還是敢夢不敢想。「16歲喺U19亞青賽入咗6球,開始諗要做職業球員,唔少教練都覺得香港係最好選擇。其實南華曾經向我招手,但當時我仲係中學生,覺得好驚唔敢去試。後來到大埔搵我又斷腳重傷,輾轉去到大學最後一年,先至有機會正式圓夢。」

讀大學早退赴轉會記招

重返位於橫琴島的澳門大學,「嘉恆」不禁想起轉會當日還在上課,要向教授申請早退趕赴記招,惹得同學歡呼聲四起。「其實唔少運動員朋友都有夢想,球員要外闖,除咗因為外援名額,條件亦係考慮因素,未必個個屋企可以負擔得到。」加盟大埔首季只曾正選上陣3次,「嘉恆」大部分人工已用作穿梳港澳的交通費,全靠家人默默支持。「有段時候要問屋企攞錢生活,諗番都唔好意思。父母希望我完成學位有保障,試過朝早練完波返澳門上堂,夜晚又要為澳門備戰國際賽,有一剎那真係好想放棄。」倔強冒險去征討,身體卻超出負荷。一次練習受傷休息3個月,反而因禍得福。「如果唔係養傷,我諗冇咁快可以畢到業!既然練唔到波,惟有做GYM鍛鍊上身肌肉,成間大學我去得最多就係GYM房!」

除了健身室,大學校園還有保養得宜的真草足球場,筆者正想讚嘆設備比起香港還要齊全,「嘉恆」卻說:「其實全澳門只得4個真草場,我細個係踢沙地,要着『白飯魚』先唔會跣親。」政府每年派錢,亦彌補不了先天環境限制,「嘉恆」卻沒埋怨生於澳門。「講起澳門足球,外界好自然諗起個輸字。人哋點睇唔緊要,最緊要係自己爭氣,我都希望可以做到榜樣,讓更多澳門球員勇敢嘗試。」除已轉為本地球員,「嘉恆」今季上陣機會漸多,轟破南華的關鍵入球,總算撥開雲霧見彩虹:「夢想係要用行動去實現,唔好得個講字。」無盡旅途可以走得多遠?「嘉恆」先定下兩年目標,看看能否向外再闖,難得夢一場革命不老。

文/攝:徐嘉嘉