Marco激like火箭枱
香港首席桌球手「Wonder爸」傅家俊回港休假陪妻女過聖誕，但放假不離打波，昨日Marco一家四口落去九龍城廣場東亞桌球中心，試打該張由奧蘇里雲設計的「火箭枱」，東亞桌球中心將Marco打波照片放上facebook，並留言「Marco第一次打火箭枱，一落手第一鋪就一cue清枱」，勁呀！
這張「火箭枱」造價高達34萬港元，全球限量10張，第1張放在奧蘇里雲屋企，第2張送到了東亞桌球中心，不少本港桌球好手及喜愛桌球的影視紅星排住隊試枱，個個打完都讚好嘢，今次輪到傅家俊出手，香港波王同火箭枱似乎特別配合，放假中的Marco仍可以一cue清枱。
東亞桌球中心負責人、香港桌球名將陳偉明表示，想打「火箭枱」必須預約，但香港精英運動員例外，東亞桌球中心隨時歡迎選手們前來練波，希望港隊球技更進一步，爭取更多榮譽，為港爭光。傅家俊來試枱前，吳安儀已經來過兩次，其他選手亦可前來使用。
帶埋包包米米一齊玩
Marco除了自己試枱，兩位女兒「包包」與「米米」都在「火箭枱」上玩耍，其中「包包」在父親幫助下打藍波中袋，場面相當趣怪。