擁有Model外表的文彼得練得一身朱古力肌，除時刻鍛鍊有助及時復出，「文總」直言因為貪靚才持之以恆Keep住健身，還要忍口戒掉「油、鹽、糖」，難怪在球圈型足16年，依然無人匹敵！
文彼德出道初年身材瘦削，自愛上健身後練出完美線條：「足球員太大隻會有礙靈活，所以訓練要適可而止，我亦唔會練到爆肌，最緊要係夠均勻，着衫先會好睇。我認我係自戀，只要照鏡見到效果，幾辛苦都值。」「文總」早前與未婚妻Alice遠赴首爾拍攝結婚照，俊男美女儼如韓星。不過原來在對和富大埔復出之役，Alice才是首度入場見證文彼得場上英姿，卻怕見「老公仔」受傷提心吊膽，難怪「文總」笑言，最期待年輕球員接班的，會是未來「文太」。