潮韋教波教埋做人
NBA雷霆球星韋斯布克（Westbrook）昨日訪港，展開大中華之旅香港站活動，「潮韋」一來到就連走兩場，先去西灣河指導「邊青」籃球技術，鼓勵青少年做人要有目標，之後去理大同一班大專精英鍊過，仲同學生組隊打2on2，示範歐洲步同入樽，參加今次活動嘅青少年堅係學到嘢。
韋斯布克到港首站係西灣河協青社，大批粉絲昨午冒雨前來見偶像，雖然「二少」因天雨遲到成粒鐘，但大家都體諒佢，當韋斯布克出場時，觀眾即高聲歡迎，佢亦都好Nice揮手同露出燦爛笑容回應，仲進行分享和交流，勸勉一班年輕人：「喺生活上遇到挫折唔好咁易氣餒，要繼續勇往直前，朝住目標進發先有機會取得成功！」
傳授歐洲步秘訣
除咗韋斯布克之外，同場亦有甲一東方球員李琪擔任助教，兩人打咗次1on1，結果「二少」睇穿李琪會射3分，將個波block咗落嚟，果然NBA球星係唔同啲。其後一班青少年進行1on1練習，更獲「潮韋」傳授歐洲步秘訣！
其後「二少」趕到理工大學同一班大專生打波，活動水平相當高，皆因多位甲一球員在陣，並由余理洋擔任助教，經過一輪熱身之後，韋斯布克表現更加活潑，仲嚟番幾個入樽，全場拍爛手掌！見到一班學生，令「二少」諗起自己大學時代，佢話：「打波還打波，大家千祈唔好荒廢學業，波幾時都有得打，吸收知識就能終身受用。」