登耶穌山被劏一頸血

去到山腳的纜車站，發現有兩種登山方法，一種是登山纜車，但卻需要網上先預約乘坐；另一種則是「陀地」經營的小型巴士，但由於是次行動乃臨急臨忙出發，當然沒有事先預約，惟有選擇乘坐「陀地小巴」了！不過有趣的是肥金上車後，「陀地小巴」先載我到一個售票處落車買飛（30元雷亞爾，約72元港幣），然後要換乘另一架車再在山腰位置轉車，這當然又要再買飛（約91港元）啦！而「陀地」此時更露出真面目，說「普通飛」要等兩小時才有車，但黃牛飛（約120港元）就可以立即上車……嘩！「肥金」困在山腰位置上落不得，惟有焗畀！我亦終於明白為甚麼一程路要分三架車接載了！

Google Maps引路扮唔識

幾番波折，肥金終於登上耶穌山，更完成了採訪任務。回程時因要趕返運動員村，跟黃鎮廷與單車隊做訪問，卻遇上扮傻兜路「的士佬」！其實我在異鄉搭的士就預咗兜路兼被劏，但在我趕時間之際卻把原本一小時車程變成兩小時，加上我開着「Google Maps」提「的士佬」別再兜路，但他總是扮傻，最後亦只能躁底地就範！更慘是這「的士佬」令我僅餘的午飯時間落空；唯一令肥金感覺賺到的，就是能夠在工作之餘，與巨型耶穌像合照，這絕對是「有今生、無來世」！

P.S.讀者們想去耶穌山，可選擇乘地鐵站1或2號線，到Largo do Machado Station，再轉巴士到Sao Judas Tadeu Church落車，便可抵達纜車站，仲要記得提早網上預約呀！