KD:願做控衞夾咖哩仔!

勇士球星杜蘭特(KD)結束三日兩夜香港之旅前接受專訪,首次透露由雷霆轉投勇士的心路,坦言非常期待在勇士比賽,又表示與史堤芬居理合作不存在問題,甚至甘願為「咖喱仔」作嫁衣裳,不介意分擔控球工作,但KD相信隊友亦會願意配合自己,一切會交畀教練卡爾決定。

杜蘭特轉會勇士已成定局,但不少球迷對KD在球隊定位上都存在疑問,他親自解釋:「這是我自己的決定,我不知道下年會發生甚麼事情,但我一定盡力為勇士打拚。」KD與咖哩仔都係得分高手,但杜蘭特表示,二人合作不會有問題:「我與史堤芬居里可以互相配合,大家都能夠走位同得分,我可以控球製造機會畀居里,佢亦可以製造番機會畀我。」至於實際分擔控球問題,KD就回應說全都交給教練卡爾決定:「我相信所有隊友都會願意配合我,但我亦相信卡爾會搵到一個最適合球隊嘅戰術,我會盡我所能幫助球隊贏波。」

愛福地香港 要向親友推介

雖然已經是第三度訪港,但KD對香港的人和事依然甚感興趣,三日來除了出席品牌活動,自己亦抽空周圍遊覽香港,分別到過銅鑼灣、赤柱及中環等幾個地方,展示他對香港的熱愛:「我愛香港,特別係呢度嘅人,因為佢哋熱情之餘亦好鍾意籃球。如果親朋戚友問我最喜愛嘅城市,我必定會推介香港!」問到對早兩日在修頓接觸過的香港年輕球員有甚麼建議時,他就強調一定要有耐性、努力練習,因為他說自己都要花一段很長的時間才可以找到自己的定位。

大讚里奧中國對手周琦

繼上屆倫奧奪金後,KD於今屆里奧更是肩負起整隊美國男籃,但他表示如要成功衞冕,必須作出犧牲:「隊入面每一個都獨當一面,但為咗金牌,大家必須改變自己喺球隊嘅打法。而且大家都經過漫長嘅球季,所以絕對唔可以輕敵,每一場都要當季後賽Game7去打。」基於美國男籃在奧運將會與中國同組,所以KD亦有留意中國隊的球員,特別是在最近在NBA選秀被選中的周琦,除大讚他打法全面之外,亦認為他的成功將會啟發更多中國人追逐籃球夢。